ஜப்பான் தலைநகர் டோக்கியோவில் கடந்த ஆண்டு நடக்க இருந்த ஒலிம்பிக் போட்டி கொரோனா பரவலால் இ்ந்த ஆண்டுக்கு தள்ளிவைக்கப்பட்டு உள்ளது.  இதன்படி, வருகிற ஜூலை 23ந்தேதி தொடங்கி ஆகஸ்டு 8ந்தேதி வரை போட்டிகள் நடைபெறும் என அறிவிக்கப்பட்டது.  பாராலிம்பிக் போட்டிகள் ஆகஸ்டு 24ந்தேதி தொடங்கி செப்டம்பர் 5ந்தேதி வரை நடைபெறும்.

 

ஒலிம்பிக் போட்டிகள் நடைபெற இன்னும் 10 வாரங்களே மீதமுள்ளன.  இந்நிலையில், சமீபத்தில் நடத்தப்பட்ட சர்வே ஒன்றில், ஜப்பானில் 80 சதவீத மக்கள் ஒலிம்பிக் போட்டிகள் நடத்த எதிர்ப்பு தெரிவித்து இருப்பது தெரிய வந்துள்ளது.

 

இந்த சர்வேயில், 1,527 பேர் பங்கு பெற்றனர். அவர்களில் 43 சதவீதத்தினர் ஒலிம்பிக் போட்டிகள் ரத்து செய்யப்பட வேண்டும் என்றும் 40 சதவீதத்தினர், நாட்டில் கொரோனா பாதிப்பினை முன்னிட்டு போட்டிகளை வேறு நாட்களுக்கு தள்ளி வைக்க வேண்டும் என்றும் பதிலளித்து உள்ளனர்.

 

போட்டிகளை நடத்த 14 சதவீதத்தினரே ஆதரவு தெரிவித்திருக்கின்றனர்.

 

சர்வேயில் கலந்து கொண்டவர்களில் 59 சதவீதத்தினர், ஒருவேளை போட்டி நடத்தப்பட்டால் ரசிகர்கள் யாரும் வரவேண்டாம் என்றும், 33 சதவீதத்தினர் குறைவான ரசிகர்கள் வரலாம் என்றும் தெரிவித்தனர்.  வழக்கம்போல் போட்டிகளை நடத்தலாம் என 3 சதவீதம் பேர் மட்டுமே தெரிவித்து உள்ளனர்.

 

வெளிநாட்டில் இருந்து வர கூடிய போட்டியாளர்கள் மற்றும் பணியாளர்கள் ஆகியோரால் கொரோனா வைரசானது பரவ கூடிய ஆபத்து உள்ளது என்று 87.7 சதவீதம் பேர் கவலை தெரிவித்து உள்ளனர்.