நாட்டின் மிகப் பெரிய ஓட்டல் நிறுவனங்கள், கடந்த நிதியாண்டில், 65 சதவீதம் அளவுக்கு வருவாய் இழப்பை காணக்கூடும் என, ஆய்வு அறிக்கை ஒன்று தெரிவித்து உள்ளது.

கடந்த ஆண்டு கொரோனா பரவலால் பயணங்கள், தங்குவது ஆகியவை சுருங்கிய காரணத்தால், நிறுவனங்கள் கடுமையான வருவாய் இழைப்பை சந்திக்கக்கூடும். செலவினங்களை கடுமையாக குறைக்க நிறுவனங்கள் பல நடவடிக்கைகளை மேற்கொண்ட போதிலும், கடந்த நான்கு ஆண்டுகளின் ஒட்டுமொத்த லாபத்தை துடைத்துவிடும் அளவுக்கு, நிகர இழப்புகளை சந்திக்க நேரிடும். நடப்பு நிதியாண்டின் இரண்டாவது பாதியில், நிலைமையில் முன்னேற்றம் ஏற்படும் என, எதிர்பார்க்கப்படுகிறது.

கொரோனா பரவல் உலகம் முழுக்க மீண்டும் அதிகரித்துவிட்ட சூழ்நிலையில், அவை வளர்ச்சிக்கு தடையாக அமைந்து விடும் நிலை உள்ளது.  கொரோனாவுக்கு முந்தைய நிலையை இத்துறை நிறுவனங்கள் எட்டுவதற்கு இன்னும், இரண்டு அல்லது மூன்று ஆண்டுகள் வரை ஆகும் என தெரிகிறது.

மும்பை வான்கடே மைதானத்தில் 14வது ஐ.பி.எல். கிரிக்கெட் தொடரின் 8வது லீக் ஆட்டம் நேற்று நடைபெற்றது.  இதில், டோனி தலைமையிலான சென்னை சூப்பர் கிங்ஸ் மற்றும் லோகேஷ் ராகுல் தலைமையிலான பஞ்சாப் கிங்ஸ் அணிகள் விளையாடின.

பஞ்சாப் அணி 20 ஓவர்களில் 8 விக்கெட்டுகளை இழந்து 106 ரன்கள் சேர்த்தது.  அடுத்து விளையாடிய சென்னை அணி, 15.4 ஓவர்கள் முடிவில் 4 விக்கெட்டுகளை இழந்து, 107 ரன்கள் எடுத்தது. இதன் மூலம் சென்னை அணி 6 விக்கெட் வித்தியாசத்தில் வெற்றி பெற்றது.  அடுத்த போட்டியை சென்னை அணி வருகிற திங்கட்கிழமை ராஜஸ்தான் ராயல்ஸ் அணியுடன் விளையாட உள்ளது.

பிரபல நகைச்சுவை நடிகர் விவேக் இன்று அதிகாலை சென்னையில் உள்ள ஒரு தனியார் மருத்துவமனையில் காலமானார். அவருக்கு வயது 59. 

 நடிகர் விவேக் நேற்று முன்தினம் கொரோனா தடுப்பூசி போட்டுக்கொண்டார். தடுப்பூசி போட்டுகொண்ட பின்னர் செய்தியாளர்களிடம் பேசிய நடிகர் விவேக், "கொரோனா தடுப்பூசி  குறித்து வதந்திகள் பொதுமக்களிடையே பரவி வருகின்றன. கொரோனா தடுப்பூசி போட்டுக்கொள்வதால் நமக்கு எந்தவித ஆபத்தும் ஏற்படாது. வதந்திகளுக்கு முற்றுப்புள்ளி வைக்க அரசு மருத்துவமனையில் நான் கொரோனா தடுப்பூசி செலுத்திக்கொண்டேன்” என்று கூறினார்.

"முகக்கவசம் அணிதல், கைகளை அடிக்கடி கழுவுதல், தனிமனித இடைவெளியை கடைபிடித்தல் ஆகியவைதான் மக்களுக்கு சமூகப் பாதுகாப்பு. ஆனால், கொரோனா தடுப்பூசி மட்டும்தான் மருத்துவ ரீதியான ஒரேயொரு பாதுகாப்பு. இதுதான் உயிரைக் காப்பாற்றுகின்ற பாதுகாப்பு. இதைச் செலுத்திக்கொண்டால் கொரோனா தொற்று வராது என்பதல்ல. வந்தாலும் உயிரிழப்பு இருக்காது. இரு டோஸ் செலுத்திக்கொண்ட இரு வாரங்களுக்குப் பின்புதான் நோய் எதிர்ப்பு சக்தி நம் உடலில் உண்டாகும்." என்றும் நடிகர் விவேக் அப்போது விளக்கினார்.

அடுத்த நாள் அவருக்கு மாரடைப்பு வந்த நிலையில், இதற்கு கொரோனா தடுப்பூசி தான் காரணமோ என்ற அச்சம் மக்களிடையே பரவியது. கொரோனா தடுப்பூசியின் பக்க விளைவு காரணமாக அவருக்கு மாரடைப்பு ஏற்பட்டதா என்ற ஊகங்கள் வலுப்பெற்ற நிலையில், பீதி பரவுவதைத் தடுக்க நேற்று மதியம் அவர் அனுமதிக்கப்பட்டிருந்த மருத்துவமனை ஒரு அறிக்கையை வெளியிட்டது.

நடிகர் விவேக்குக்கு கொரோனா தடுப்பூசியால் மாரடைப்பு ஏற்படவில்லை என்று மருத்துவமனை கூறியது. அவருக்கு கொரோனா தொற்றும் இல்லை என்பது பரிசோதனையில் உறுதி செய்யப்பட்டது.  

நடிகர் விவேக்குடன் அவரது 6 நண்பர்களும் தடுப்பூசி போட்டுக்கொண்டதாகவும், அவர்கள் அனைவரும் நலமாக இருப்பதகவும் மருத்துவர்கள் கூறினர். அவரது திடீர் மாரடைப்புக்கு தடுப்பூசி காரணம் அல்ல என்பதையும் மருத்துவர்கள் தெளிவுபடுத்தினர். 

நடிகர் விவேகிற்கு ரத்தக் குழாயில் அடைப்பு ஏற்பட்டது, தடுப்பூசி செலுத்திகொள்வதால் ரத்தக் குழாயில் அடைப்பு ஏற்படாது என்பதையும் மருத்துவர்கள் விளக்கினர். "அடைப்பால் மூளைக்கு செல்லும் இரத்த ஓட்டம் குறைந்தது. மயங்கிய நிலையில் அவர் மருத்துவமனைக்கு அழைத்து வரப்பட்டார். அவருக்கு தீவிர சிகிச்சை அளிக்கப்பட்டு வருகிறது" என்று மருத்துவமனை தெரிவித்தது.

கொரோனா காலத்தில் ஏற்படும் ஒவ்வொரு விஷயமும் கொரோனா பெருந்தொற்றுடன் தொடர்பு படுத்திப் பார்க்கப்படுகின்றது. எனினும், பெருந்தொற்று என்ற திரையை நீக்கி விட்டு உள்ளதை உள்ளபடி பார்க்க வேண்டியது தற்போது காலத்தின் கட்டாயமாகும். 

சிரிக்க வைத்து அனைவரையும் மகிழ்வித்த நடிகர் விவேக்கின் மரணம் பல சந்தேகங்கங்களைக் கிளப்பியுள்ளது. 

வெளிநாடு வாழ் இந்தியர்களுக்கு வழங்கப்படும் அட்டையை புதுப்பிப்பதற்கான விதிகளை மத்திய அரசு எளிமையாக்கியுள்ளது; இதை அமெரிக்க வாழ் இந்தியர்கள் வரவேற்றுள்ளனர்.

வெளிநாடு வாழ் இந்தியர்களுக்கு மத்திய உள்துறை அமைச்சகம் ஓ.சி.ஐ. கார்டு வழங்குகிறது. இந்த கார்டு வைத்திருப்பவர்கள் இந்தியாவுக்கு வருவதற்கு 'விசா' பெறத் தேவையில்லை. இந்த கார்டு வைத்துள்ளவர்கள் 20 வயது முடிந்ததும் ஒரு முறையும் 50 வயது முடிந்ததும் ஒரு முறையும் கார்டை புதுப்பிக்க வேண்டும்.

இதனால் 'பாஸ்போர்ட்'களை புதுப்பிக்கும் போது சிக்கல்கள் ஏற்படுவதாக வெளிநாடு வாழ் இந்தியர்கள் புகார் செய்தனர். இந்நிலையில் 'ஓ.சி.ஐ. கார்டை 20 வயது பூர்த்தியான பின் புதுப்பித்தால் போதுமானது. அதன்பின் புதுப்பிக்க தேவையில்லை' என மத்திய உள்துறை அமைச்சகம் அறிவித்துள்ளது. இதை அமெரிக்க வாழ் இந்தியர்கள் வரவேற்றுள்ளனர்.